Classic Poem

Predicatór
Tenc per meillór,
Quam fai l'obra que manda far,
Non fas selui
Que l'obra fai
Que als autres vai predicar.

Qui en predic
Met son afic
Lo fach e-l dich deu ajostar,
Car meils lo cre
Aquel que-l ve
Son predic per l'obra mcstrar.

Ar escoutat,
Per eus vostre at,
E non vos grev al comensar
Que, a derrièr,
D'autre Gautier
Cug que m'auzires vïolar.

Ieu ai en còr
Que, per demòr
Ni per rire ni per jogar,
No-us diga huèi
Mal ni enuèi,
De guiza que-us deia pezar

No-us dirai rén
Mas sol per bén
E per obs e per esmendar,
E s'ie-us reprén
Adrechamén
No m'o deves a mal tornar.

Que son enfan
Bat hom enan
E-il castía sos malestar
Non fai l'estrain,
De cui no-l tain
Si-l vezía peiras lansar.

Me tain de vós,
Per qu'es razos
Que vos castic, si o sai far,
Mas no m'a at,
Que n'ai tal grat
Com a, de rascas, penchenar.

Con plus vos dic
E plus m'afic
En vos, castian, enseinhar,
Vos fest pejor
Per c'ai paór
Que m'en covenga a laisar,

C'aitan si pert
Qui en dezert
Semena fromen ses arar
Ni en chalméil
Espan son méil:
Non sap gaire de laorar

Qui vaissel plén
D'alcuna rén
Cuia emplir en nou voidar,
Petit en sap,
Que plus no-i cap
Si so que-i es non vol gitar.

Vos, ses vaissel
Cortes e bel,
Que ren no i cal meillurar:
Mas car ses plé
De tan vil ré
Don farías ben a semar,

Semar vos vòilh
De gran orgòilh
Que-us fa conbatre e raínar,
De cobeitat
Don ses enflat
Que-us fa mentir e prejurar,

De mala fé
Don ses tan plé
Que l'uns no-s fiza en son par,
De totz los mals
Ques a hom fals
Que mostran via d'enganar.

Voill vos gardés,
Pois apenrés
La qual vía deu tener bar,
Car de cussó
Tro a baró
A longa via az anar.

Mas per aver,
No-s desesper
Paures hom ni aco non guar,
Que no-i fai re,
Segon qu'ieu cre,
Mas sol la vía empaitar.

Vers es c'argens
E garnimens
Fan de cusson baron semblar,
Mas tot es fals,
Que desleials
Escutz es ab lo mantel var.

Tals a vestit
Drap de samit
E pot be gran aver mandar,
Que ges no-l do
Nom de baro,
Quan li vei malvestat menar.

E tals es nus,
Que non a plus
C'aquel c'om porta bateiar
Sol car es pros
E-il plas razos,
Lo deu hom baron apellar.

Per que vos quièr
Que drechurier
Sïatz e voillatz gazanhar
Nom de baro,
Gardan razo
On plus fort la poires gardar.

Digas vertatz
Merce obratz
Ab donar et ab albergar
La paura gén,
Car li manén
Devon los paures arezar.

E sías dous
E piatous;
Non vos doptes abandonar
A caritatz
Car, so sapchatz,
Non i pot hom mal mercadar.

Sias umil,
Si c'al plus vil
Sufratz que-us puesca foleiar
Si cors li-n vé:
Pueis trop mercé
Si la vos denna demandar.

Perdonatz lèu,
Vengatz vos grèu,
E non vos cal cheira portar;
Amas amix
E enemix,
E no-us cal anar outra mar.

Ja hom cochós
Non torn de vós
Ses conseil, si li podes dar,
C'aissi cové
C'om greuge sé
Per los autres en aizinar.

Car hom non a
Valor en va,
Ans la li coven a comprar
De son avér,
De son sabér,
De son conseil, de son parlar.

Tot son esfòrs
D'arm'e de còrs,
Deu hom metre en Dieu amar;
Pueis am la gén
Tot eissamén
Con se, e no-l cal ren glozar.

Sabes cals és
Pros e cortés
E cal deu hom baron clamar?
Aquel que fai
So qu'a Dieu plai
E si garda de son pezar.

E sabes cals
Es homs leials
E cals pot leial anar?
Qui la lei cré
E la lei té
E segon la lei vol obrar.

Qui aisso fai
Ab Dieu s'en vai,
Que res non li o pot vedar,
E-l guizardóns
Sera plus bons
C'om no pot dire ni pensar.

Qui pros sera
Pro si aura,
E qui volra la lei gardar
Es la leis lui,
Si c'anbedui
Cascuns er garda de son par.

Et ab aitan,
Anem enan
E laissen lo sermon estar;
Qui ben fara
Ben trobara;
Per c'om di, que cascuns si gar.