Classic Poem

gile fuzuul the ahad-e-vafaa ke hote hue
so chup rahaa sitam-e-naaravaa ke hote hue

ye qurbato.n me.n ajab faasale pa.De ki mujhe
hai aashnaa kii talab aashnaa ke hote hue

vo hilaagar hai.n jo majabuuriyaa.N shumaar kare.N
chiraaG ham ne jalaaye.N havaa ke hote huye

na kar kisii pe bharosaa ke kashtiyaa.N Duubii.n
Khudaa ke hote huye naaKhudaa ke hote huye

kise Khabar hai ki kaasaa-ba-dast phirate hai.n
bahut se log saro.n par humaa ke hote hue

'Faraz' aise bhii lamhe.n kabhii kabhii aaye
ki dil giriftaa rahaa dilrubaa ke hote hue