Classic Poem

Der lewe wecket syne kynt mit der stemme so,
Daz sie da von irquecken vnde sider wassent ho.
Der struz syne ivngen, so man seit,
brüt mit den ougen. merket an disen sachen:
Eyn herre solte tzv allen tziten haben lewen rüf
Vnde solte dar an gedenken, daz in got dar tzv gescüf,
Er solte der armen kristenheit
myt syme swerte güten vride machen.
Ouch solte er struzes ougen han,
Da mite solte er werde ritter mynnen;
Er solte der milte bi gestan.
Tete er daz, so were er wert wol eyner keyserynnen.
Man sol den edelen ritteren beide ligen vnde geben,
Sie dienentz wol of eynen tac, swen sie da vmme wagent ritters leben.