Classic Poem

Ther is a chielde, a heuenly childe,
Iborne this nyght of Marie myelde.

This chielde is, was, and ay shall be
One in Godhede, in persones thre.
There is a childe, a heuenly childe. . .

This chielde is named Criste Jhesus
That nowe is borne for loue of vs.
There is a chield, a heuenly childe. . .

Mortall nature this chielde hath take
Of oure thraldome vs free to make.
There is a chield, a heuenly childe. . .

This chielde is God and man also,
Now borne to bringe vs out of wo.
There is a chield, a heuenly childe. . .

His Fader is God of Heven Blis,
And virgyne Mary his moder is.
There is a chield, a heuenly childe. . .

Fro heven to erthe this chielde come is
To suffre dethe for mannys mys.
There is a chield, a heuenly childe. . .

On Good Friday vppon the roode
To save mankyende he shed his bloode.
There is a chield, a heuenly childe. . .

This chielde was dede and in graue laye
And rose ayene on the thirde daye.
There is a chield, a heuenly childe. . .

By his grete myght to blis he stide
And sittith on his Faders right side.
There is a chield, a heuenly childe. . .

Whenne he shalle come and jugement make,
To blis with hym this chielde vs take.
There is a chield, a heuenly childe. . .