Classic Poem

Blind man be blyth, althoch that thow be wrangit:
Thoch Blythe be herreit, tak no melancolie.
Thow sall be blyth, quhan that thay sall be hangit,
That Blythe hes spulyeit sa maliciousle.
Be blyth, and glaid; that nane persave in the
That thy blythnes consists into rychés;
Bot that thow art blyth that eternalie
Sall ring with God in eternál blythnés.

Thoch thai have spulyeit Blythe of gud and geir,
Yet have thai thieves left lyand still the land;
Quhilk to transport was nocht in thair poweir,
Nor yit will be, thoch na man thame ganstand.
Thairfoir be blyth: the tym may be at hand,
Quhen that Blythe sall be yit, with Godis grace,
As weil plenneist, as ever thai it fand:
Quhil sum sall rew the rinning of that race.

Ay to be blyth [thow] utwardlie appeir;
That be na man it may persavit be,
That thow pansis for tynsal of thy geir.
[Left] thy unfrendis, that ar proud and hie,
Be blyth and glaid of thy adversitie.
Thairfoir be stout, and gar thame understand
For lois of geir thow takest na suffrie:
For yit be glad thow hes aneuch of land,

Be blyth, and glad, than ay in thy intent;
For lisum blythnes is ane happie thing.
Be thow nocht blyth, quhat vaileth land or rent?
And thow be blyth is caus of lang leiving.
Be thow nocht blyth, thoch that thow war an king,
Thy lyf is nocht bot cair without blythnés.
Thairfoir be blyth: and pray to God us bring
Till his blythnes; and joy that is endlés.