Classic Poem

Luke that nathing to syn ye tyce;
Bot grund ye ay upon justice.
Ay folow vertew, and fle vyce.
Of toung be trew.
Ay hait all kynd of covatyce.
Waste nocht thy gudis at the dyce.
Fle fra all fulis that are nyce,
And thame eschew.

Hald ye in honest companie.
Thy persoun gyd ay honestlie:
And haunt na kynd of harlatrie:
Fra syn abstene.
Deil with all folkis faythfullie:
And use thé never for to lie.
Conqueis na guidis wrangouslie
Be na fals mene.

To every persoun do ressoun.
Keip ay fra melling with tressoun.
And tak in thank and guid sessoun
Quhat God wil send.
Put na man, be oppressioun,
Furth of his richt possessioun.
To God mak intercessioun
For ane gude end.