Classic Poem

Of one that is so fair and bright,
Velud maris stella,
Brighter than the dayes light,
Parens et puella,
Ich crie to thee; thou see to me!
Levedy, pray thy Sone for me,
Tam pia,
That ich mote come to thee,
Maria.

Levedy, flowr of alle thing,
Rosa sine spina,
Thou bere Jesu, Hevene-King,
Gratia divina.
Of alle thou berst the pris,
Levedy, quene of Paraÿès
Electa.
Maide milde moder is
Effecta.

Of care conseil thou art best,
Felix secundata;
Of alle wery thou art rest,
Mater honorata.
Bisek Him with milde mood
That for us alle shad His blood
In cruce
That we moten comen til Him
In luce.

Al this woreld war forlore
Eva peccatrice,
Til our Loverd was y-bore
De te genitrice.
With " ave " it went away
Thuster night, and comth the day
Salutis;
The welle springeth out of thee
Virtutis.

Wel He wot He is thy Sone
Ventre quem portasti;
He wil nought werne thee thy bone,
Parvum quem lactasti.
So hende and so good He is,
He haveth brought us to blis
Superni,
That haves y-dit the foule pit
Inferni.