Classic Poem

I lo'ed a proud lassie, I lo'ed her for lang,
I wooed her wi' pipe, and I wooed her wi' sang;
I wooed her by streamlet an' bonny green shaw;
I wooed her at kirk, and at market an' a':
I proffered nae gowd, an' I offered nae gear,
I proffered her nought but a heart a' sincere;
But gin I cam near her wi' head cast ajee,
She cries, " Play your pranks wi' some ither than me. "

I heaved mony sighs, an' I shed mony tears,
For moments o' hope I had towmonds o' fears;
I gazed an' I gapit wi' heart loupin' fu',
My words were sae big that they stack in my mou';
But her lips o' coral, an' bosom o' snaw,
Seemed hard as the ice that nae simmer could thaw;
For gin I come near her wi' head cast ajee,
She cries, " Play your pranks wi' some ither than me. "

Last week on the hairst rig we shure side by side,
Lettled wi' kindness to saften her pride;
I shure a' the week for mysel' an' her too,
An' left the bit lassie but little to do;
But, losh! how my heart lap when doun 'mang the corn,
She ask't me to pick frae her wee hand a thorn;
Her head on my bosom fu' soon fell ajee,
She sighs, " Gi'e your love to nae ither than me. "

Wi' deeds, no wi' words, thus I won my sweet bride,
For kindness gets kindness as floods swell the tide;
An' he wha wad marry the lassie he lo'es,
May say what he likes, but maun mind what he does;
For virtue is modest an' near kin to pride;
It's no very easy sic twins to divide;
She's weel worth the winning whais head's cast ajee,
And cries, " Play your pranks wi' anither than me. "