Classic Poem

" Lassie wi" the gowden hair,
Silken snood, and face sae fair;
Lassie wi' the yellow hair,
Think na to deceive me!
Lassie wi' the gowden hair,
Flattering smile and face sae fair;
Fare-ye-weel! for never mair
Johnie will believe ye!
O no! Mary Bawn, Mary Bawn, Mary Bawn,
O no! Mary Bawn, ye'll nae mair deceive me!

Smiling, twice ye made me troo,
Twice — (poor fool!) I turned to woo;
Twice, fause maid! ye brak your vow,
Now I've sworn to leave ye!
Twice, fause maid! ye brak your vow,
Twice, poor fool! I've learned to rue! —
Come ye yet to mak me troo?
Thrice ye'll ne'er deceive me!
No! no! Mary Bawn, Mary Bawn, Mary Bawn!
O no! Mary Bawn! thrice ye'll ne'er deceive me.

Mary saw him turn to part;
Deep his words sank in her heart;
Soon the tears began to start —
" Johnie, will ye leave me!"
Soon the tears began to start,
Grit and gritter grew her heart!
" Yet ae word before we part,
Luve could ne'er deceive ye!
O no! Johnie dow, Johnie dow, Johnie dow,
O no! Johnie dow — luve could ne'er deceive ye."

Johnie took a parting keek,
Saw the tears hap owre her cheek!
Pale she stood, but coudna speak! —
Mary's cured o' smiling.
Johnie took anither keek —
" Beauty's rose has left her cheek! —
Pale she stands, and canna speak —
This is nae beguiling .
O no! Mary Bawn, Mary Bawn, dear Mary Bawn!
No, no! Mary Bawn — L UVE has nae beguiling.