Classic Poem

Floribus Angligenis non hanc tibi necto corollam,
Cum satis indigenis te probet ipse Liber:
Per me Roma sciet tibi se debere, quod Anglo
Romanus didicit cultius ore loqui.
Ultima quæ tellus Aquilas duce Cæsare vidit,
Candida Romulidum te duce scripta videt.
Consilio ut quondam Patriam nil juveris, esto!
Sed studio cives ingenioque juvas.
Namque dolis liber hic instructus, et arte Batava,
A Belga nobis ut caveamus, ait.
Horremus per te civilis dira furoris
Vulnera; discordes Flandria quassa monet.
Hic discat miles pugnare, orare senator;
Qui regnant, leni sceptra tenere manu.
Macte, Comes! virtute novâ, vestri ordinis ingens
Ornamentum, ævi deliciæque tui!
Dum stertunt alii somno vinoque sepulti,
Nobilis antiquo stemmate digna facis.