Classic Poem

Now the sun 's gane out o' sight,
Beet the ingle, and snuff the light;
In glens the fairies skip and dance,
And witches wallop o'er to France;
Up in the air,
On my bonny grey mare,
And I see her yet, and I see her yet,
Up in, &c.

The wind 's drifting hail and sna'
O'er frozen hags like a footba';
Nae starns keek thro' the azure slit,
'Tis cauld and mirk as ony pit;
The man i' the moon
Is carousing aboon,
D' ye see, d' ye see, d' ye see him yet?
The man, &c.

Take your glass to clear your een,
'Tis the elixir hales the spleen,
Baith wit and mirth it will inspire,
And gently puff the lover's fire,
Up in the air,
It drives away care.
Ha'e wi' ye, ha'e wi' ye, and ha'e wi' ye, lads, yet,
Up in, &c.

Steek the doors, keep out the frost,
Come, Willy, gi'e 's about ye'r toast;
Tilt it, lads, and lilt it out,
And let us ha'e a blythsome bowt;
Up wi't there, there,
Dinna cheat, but drink fair;
Huzza! huzza! and huzza! lads, yet,
Up wi't, &c.