Classic Poem

Be diuers wyis and operatiounes
Men makis in court thair solistationes:
Sum be service and diligence,
Sum be continvall residence.
Sum one his substance dois abyd,
Quhill fortoune do for him provyd.
Sum singis, sum dances, sum tellis storyis,
Sum lait at ewin bringis in the moryis.
Sum flirdis, sum fenyeis and sum flatteris,
Sum playis the fuill and all owt clatteris.
Sum man musand be the waw
Luikis as he mycht nocht do with aw.
Sum standis in a nuk and rownes,
For covetyce ane vthair neir swownes.
Sum beris as he wald ga vud,
For hait desyr off varldis gud.
Sum at the mes lewes all devocion,
And besy labouris for premocione.
Sum hes thair aduocattis in chalmir,
And takis thame selff thairoff no glawmir.
My sempillnes, amang the laiff,
Wait off na way, sa God me saiff,
Bot with ane hummble cheir and face
Refferis me to the kyngis grace.
Methink his graciows countenance
In ryches is my sufficiance.