Classic Poem

They're a' gane thegither, Jeanie—
They're a gane thegither:
Our bairns aneath the cauldrife yird
Are laid wi' ane anither.
Sax lads and lasses death has ta'en
Frae father an' frae mither;
But O! we mauna greet and mane—
They're a' on hie thegither Jeanie—
They're a' on hie thegither.

Our eild will now be drearie, Jeanie—
Our eild will now be drearie;
Our young an' bonnie bairns ha'e gane,
An' left our hame fu' eerie.
'Neath age's hand we now may grane—
In poortith cauld may swither:
The things that toddled but an' ben
Are a' on hie thegither Jeanie—
Are a' on hie thegither.

Now sorrow may come near us, Jeanie—
Now sorrow may come near us:
The buirdly chields are lyin' low
Wha wadna let it steer us.
The bonnie lasses are awa'
Wha came like sun-glints hither,
To fill wi' joy their father's ha'—
They're a' on hie thegither, Jeanie—
They're a' on hie thegither.

In the kirkyard they're sleepin', Jeanie—
In the kirkyard they're sleepin':
It may be grieves their happy souls
To see their parents weepin'.
They're on to bigg a hame for us,
Where flowers like them ne'er wither,
Amang the stars in love an' bliss—
They're a' on hie thegither, Jeanie—
They're a' on hie thegither.