Classic Poem

SONG .

Bonnie Bessie Lee had a face fu' o' smiles,
?And mirth round her ripe lip was aye dancing slee;
And light was the footfa', and winsome the wiles,
?O' the flower o' the parochin—our ain Bessie Lee!
Wi' the bairns she would rin, and the school laddies paik,
?And o'er the broomy braes like a fairy would flee,
Till auld hearts grew young agin wi' love for her sake:—
?There was life in the blithe blink o' Bonnie Bessie Lee!
She grat wi' the waefu', and laughed wi' the glad,
?And light as the wind 'mang the dancers was she;
And a tongue that could jeer, too, the little limmer had,
?Whilk keepit aye her ain side for Bonnie Bessie Lee!
And she whiles had a sweetheart, and sometime had twa—
?A limmer o' a lassie!—but, atween you and me,
Her warm wae bit heartie she ne'er threw awa',
?Though many a ane had sought it frae Bonny Bessie Lee!
But ten years had gane since I gazed on her last,—
?For ten years had parted my auld hame and me;
And I said to mysel' as her mither's door I passed,
?“Will I ever get anither kiss frae bonnie Bessie Lee?”
But time changes a' thing—the ill-natured loon!
?Were it ever sae rightly he'll no let it be;
But I rubbit at my een, and I thought I would swoon,
?How the carl had come roun' about our ain Bessie Lee!
The wee laughin lassie was a gudewife grown auld—
?Twa weans at her apron and ane on her knee;
She was douce, too, and wiselike—and wisdom's sae cauld:——
?I would rither ha'e the ither ane than this Bessie Lee!