Classic Poem

" Come, Mary, dinna say me nae,
But name at ance our bridal day;
Let love dispel your doubts for aye,
And dinna let your brow be duskit.
Although I canna cleed ye braw,
And tho' my house and mailin 's sma',
Your angel form will hallow a' —
A bonnie bride is easy buskit. "

" O dinna press our bridal now,
But rest content ye hae my vow,
My faither's frozen breast will thowe,
Sae let the spring-fed burnie gather.
He says my weal is a' his care,
He bends, I stroke his siller hair,
He weeps, I breathe a silent prayer —
I daurna leave my dear auld faither. "

" Alack! your faither's fond o' gear,
At my puir suit again he'll sneer,
And I maun lose thee, Mary dear,
Unless his angry ban ye risk it.
But gin our humble cot he'll share,
He'll welcome be, ye'll nurse him there;
I seek yoursel', I ask nae mair —
A bonnie bride is easy buskit. "

Unseen the carle stands listenin' by,
Wi' smiling mou' and glistenin' eye;
He hears his Mary gi'e a sigh,
And out he cries in tones sae huskit:
" Here tak her, Rab, my blessing hae,
Your kindly heart has won the day;
And be your bridal when it may,
Your bride shall be fu' brawly buskit. "