Classic Poem

Fyrst dame hardynes began to plede
Saynge she was to man moost profytable
For she the hertes hath often fede
Of conquerous as it was couenable
And by my corage haue made theym able
Regyons to wynne theyr ennemyes to subdue
And yf I were not they had it rue

And yf a man be neuer so wyse
Withouten me he getyth none vteraunce
Wherfore his wysedome may not suffyse
All onely without myn allegeaunce
For I by ryght must nedys enhaunce
A lowe born man to an hyghe degre
Yf that he wyll be ruled by me

Haue I not caused many a noble warreour
To wynne the batell by my grete myght
Without me was made neuer conquerour
Nor yet man coragious whan he dyd fyght
No man without me may defende his ryght
I may be worst from hym forborne
For and I were not he were forlorne

Dyd I not cause the noble hercules
By my power to wynne the vyctory
Of the sturdy and stronge Philotes
As is recorded in bokes of memory
For without me can be no cheualry
And vnder the wynge of my proteccyon
All rebels brought be to subieccyon

A realme is vpholden by thynges thre
The fyrst and the chyef it is the swerd
Whiche causeth it to be in good suerte
And other realmes of it to be aferd
By whiche the vsurpers be dyfferd
From theyr wyll with treason knyte
And by me slayn for theyr fals fyte

The seconde is lawe that euer serueth
But within the realme onely
For other nacyons our lawe ne dredeth
But our swerd they do in specyally
For and they roose ayenst vs proudly
As they haue done often in tymes past
Yet [with] our swerd they shold be ouercast

The thyrde be marchauntes that do multyply
In this realme welth and prosperyte
For of euery thynge they often occupy
Euery man lyke vnto his faculte
For without marchauntes can not be
No realme vpholden in welth & pleasure
For it to vs is a specyall tresure

Also yet hercules the puyssaunt geaunt
Dyd slee the monstre afore Troy the grete
And with his strokes he dyd hym daunt
They were so peysantly on hym sette
That he the vyctory on hym dyd gette
Had I not be comfort vnto his harte
Suche vyctory had ben leyd aparte

Dyd he not vaynquysshe in [the] forest of Nemee
The thre mortall lyons by his grete hardynes
And ryued theyr Iawes as was to se
By twene his handes by chyualrus prowes
And yet by armes and knyghtly exces
In egypt he slewe the tyraunt Busyre
And brent hym after in a grete fyre

Also he slewe the tyraunt Cacus
For his tyranny and grete myschefe
By cause his dedys were so odyous
For he dyd murdre and was a thefe
Wherfore his deth to many was leef
Who more of his actes wyll haue report
To the Troyans story lette hym resort

Also the worthy and the noble hectour
That eclyped was the troyans champyon
And of all cheualry called the flour
In his tyme reynynge and of renowne
Of whose noble dedes the brute and sowne
Was spred by euery straunge habytacyon
That they of his faytys dyde make relacyon

By his power and hardy corage
He put the grekes full often to flyght
And bete theym downe by a grete outrage
That well was he that hym saue myght
Full often he brought theym to the plyght
His dedes were pure without magycyon
And without nygromancy or suche corrupcyon

Dyd I not cause also kynge dauith
A lyon Iawbones to rent and tere
That dyd deuour his shepe in the fryth
As he sat kepynge of theym there
The lyons crueltye myght not hym fere
And he in his youth so hardy was
That he dyd sle the gyaunt Golias

Dyd I not cause the noble Iulius
Emperour of rome for to be electe
By cause he was so stronge and cheualrus
Whan in armes he knewe the affecte
He all his ennemyes dyd abiecte
And by the support of my chyef socour
He gouerned hymselfe lyke a noble emperour

And also Arthur kynge of Bretayne
With all the knyghtes of the rounde table
Neuer auentures had sought certayne
And I therto had not ben greable
They for to fyght had not ben able
Who that me lacketh is but a coward
And shame is euer his rewarde

Also kynge Charlemayne kynge of Fraunce
With his dyssypers Rowland and Olyuer
With all the resydue of his alyaunce
That in all armes so noble were
On goddys ennemyes brake many a spere
Causynge them to flee to theyr grete vylony
Hardynes was cause that they had vyctory

O worthy hardynes the shynynge sterre
Alway to mannys herte the comfort
Whan that it is the tyme of werre
Vnto what partye that thou resort
They wynne the batall by thy support
And wher that thou lettest thy bemys dyssende
They often hye to honoure assende

Than sayd dame hardynes vnto the Iuge
I pray you that ryght I may haue
Sythens I to man am chyef refuge
Whan that he lysteth of me to craue
I make hym coragyous and his worshyp saue
Wherfore I owte to haue the preemynence
By ryght reason and good experyence

That I deny you sayd dame Sapyence
Of whom haue you your ordre of pledynge
For ye neuer can haue none intellygence
But by the meane of myn informynge
For I am alway your mynde techynge
And without me your tale were but a fable
For ye without wytte sholde alway bable

This wyll I proue by myn opynyon
That I am grounde of the artes seuen
And of all good werkes in cõmunyon
For no man without me can go to heuen
My dedys be merueylous for man to neuen
Whan they ben wrought in to theyr degre
Who that wyll lerne theym he hath the lyberte

Of my dedes bokes do make recorde
The whiche clerkes put into remembraunce
For an example without dyscorde
Of heuenly way by vertuous gouernaunce
Without me man can haue no pleasaunce
Nor yet hym rule in no maner wyse
A man without wytte is to dyspyse

Hardynes without prudence may not auayle
Though that a man be neuer so sturdy
For a wyseman feble may wynne the batayle
Of hym that is ryght stronge and myghty
For better it is for to be ryght wytty
In the defence of his good saue garde
Than often to stryke and to renne forwarde

That thynge that hardynes may not wynne
May be goten by my hyghe souerente
And with the helpe of subtyle engynne
It may be brought to the extremyte
Wher that it myght not by possybylyte
Of hardynes longe afore be wonne
Yet by grete wysedome it may be donne

Vnto dyuers cases I take excepcyon
Of dame Hardynes whiche are no lawe
Vnto the fyrst vndre your correccyon
She sayd and she her power dyd wythdrawe
No rebell than shold stand in awe
And she is the chyef as I knowe well
That causeth hym for to be rebell

By her foly and folysshe hardynes
She causeth men to ryse ayenst theyr lorde
She is the cause of mortall heuynes
Whan she doth breke the good concorde
Wherfore me thynke by one accorde
For to exyle her it is now the best
Than man sholde lyue in peas and rest

And where she sayd that she exalted
Iulius cesar by her grete exylence
In that case she ryght clerely varyed
For it was I by my grete dylygence
That neuer was out of his presence
But ruled hym and made hym worthy
To be chosen emperour of all Italy

Chosen he was by the comyn assent
For the grete wysedome that in hym shone
With a grete voyce and a hole entente
For lyke vnto hym was there none
That was so abell as he alone
For to occupye an Emperours dygnyte
Of his promocyon he myght thanke me

I Sapyence am endewed with grace
And the lode sterre of heuenly doctryne
The sprynge of comfort Ioye and solace
Who that lyst to me for to enclyne
He shall knowe thynges that be dyuyne
And at his ende beholde the deyte
That is one god and persones thre

It pleased the fader that is omnipotent
His sone to send to be incarnat
Of the vyrgyn Mary the sterre moost excellent
Mayden and moder yet not vyolate
Lyke a vessell chosen and made ornat
All onely for to be goddys moder
And he hym selfe vnto man broder

But a stryfe there was bytwene god and man
Whan man consented to synne dedely
By that the dyscorde fyrst began
Whan he the sone of god on hy
That is his brother agayn wyll crucefy
Yf he had power by whiche is offended
The fader of heuen as is entended

Therfore lete vs to our brother go
Named Ihesu Cryst and axe hym mercy
With a good entent and hert also
There is for vs none other remedy
That ony tonge truely can specyfy
And he wyll take it for a correccyon
And of all vengeaunce sease the affeccyon

That we may of hym haue forgyuenes
Of our grete synne with reformacyon
Of peas bytwene the faders hyghenes
Of heuen and vs in suspyracyon
Therfore yf thou drede the amocyon
Of his ryghtwysnes loke that thou flee
Ryght fast vnto his mercyfull pyte

For his mercy is more than all our mysery
And eke aboue his werkes all
As Dauyd sheweth in his prophecy
Saynge his mercy is ouer all
To whom I pray euer in especyall
To gyue me grace well my penne to lede
That quaketh aye for drede

Dame Sapyence sayd I do procede
Of the strength of the holy ghoost
That is and shall be mater in dede
God and lorde of myghtys moost
Whose infynall power was neuer lost
And yet neuer had no begynnynge
But alway lyke stronge without endynge

Where that dame hardynes in her pledynge
Made her selfe to knyghtes moost necessary
By the meanes of her power shewynge
That I by ryght do now well deny
For in that case she dyd moche vary
For syxe there are that more profyte be
Of whiche the lest is better than she

The fyrst is prudence that is the chefe
That hym doth rule and is his gyde
And kepeth hym from grete reprefe
And causeth his worshyp for to abyde
So euery crysten man shold prouyde
By his wit to withstand the deuyll
That he consent not to do euyll

The seconde is that he sholde be true
To his souerayn lorde that on hym reyneth
And all treason for euer to eschewe
In whiche grete shame often remayneth
And by whiche he hiz k?ge dysteyneth
So a crysten man sholde be true euer
To Ihesu Cryst that was his redemer

The thyrde is that he sholde be lyberall
Amonge his cõmons withouten lette
That is the cause euer in generall
That he the loue of theym doth gette
For it causeth theyr hertes on hym be sette
So euery true crysten man sholde be
To god intended with lyberalyte

The fourth is that he sholde be stronge
His ryght euer for to defende
And neuer to no man for to do wronge
But wronges for to dyrecte and amende
As ferre as his power wyll extende
So a true crysten man sholde exclude
All maner of vyces by his fortytude

The fyfth is [that] he sholde be mercyable
In all his dedes withouten furoure
For that to hym is gretly conuenable
And eke to kepe hym out of erroure
For he of mercy sholde be a myrroure
So vnto them it is ryght necessary
Who that wyll be saued for to haue mercy

The syxte is a knyght ought for to kepe
The poore folke in theyr grete nede
That often for hungre and thyrst do wepe
He ought with almes theym for to fede
And the better he shall than spede
So euery true crysten man sholde do
As ferre as his power cometh vnto

I Sapyence am of the kynges counsayll
Whiche is clothed with purple that sygnyfyeth
The grace and the pulcrytude without fayll
Of grete vertues that in hym shyneth
For to no vyces he neuer enclyneth
Hauynge in his hede a fayre crowne royall
That sheweth his dygnyte to be regall

Whiche to his people is the chefe glory
Thrugh whome his subgectes be dyrecte
And made obedyent to hym certaynly
At euery houre by ryght true effecte
But forthermore by good aspecte
He bereth a ball in his lefte hande
The whiche betokeneth as I vnderstande

A kynge to be a good admynystratour
Vnto his subgectes in euery place
And to be for theym a good prouysour
As reason requyreth in euery case
I Sapyence do rule his noble grace
In his ryght hand he hath a septure
That doth sygnyfye by ryght his rygoure

Yll men to punysshe for theyr offence
By his ryghtwysnes whome the loue
Of vertue shynynge in experyence
Doth not extoll nor yet now remoue
A lampe doth hange his heed aboue
Alway lyght and clerely brennynge
Whiche sygnyfyeth the mercy of a kynge

The olde philosophers by theyr prudence
Fonde the seuen scyences lyberall
And by theyr exercyse & grete dylygence
They made theyr dedes to be memoryall
And also poetes that were fatall
Craftely colored with clowdy fygures
The true sentence of all theyr scryptures

O Iustyce lady and souerayne goddesse
Gyue you true sentence now vpon me
As ye be surmountynge in vertue & noblesse
Lete me dame Sapyence haue the soueraynte
As is accordynge to my royall dygnyte
For I am moost profytable vnto man
And euer had ben syns the world began

Than sayd dame Fortune ye are imperfyte
Without that I therto be accordaunt
For all your hardynes & prudence perfyte
I vnto you must be well exuberaunt
And with your werkes euer concordaunt
Where that I fauer they haue good cõfort
In all theyr dedes by my swete resort

I Fortune am the rule and steere
Of euery persone lyke to my wyll
That in this worlde now lyueth here
Whan that I lyst for to fulfyll
My mynde ryght sone I can dystyll
The dewe of comfort welth and rychesse
To man exaltynge hym to noblenesse

Though that a man were neuer so hardy
Without me he myght not attayne
And though that a man were neuer so wytty
And I dyd my power from hym refrayne
All his labour were lost in vayne
So hardynesse and prudence in no wyse
Without good fortune may well suffyse

Though that a man were but a fole
Yf I consent that he be fortunate
He nedyth not to make no grete dole
For I shall mayntene so his estate
That he in rychesse shall be so eleuate
Fulfylled with welth & worldely tresure
That he shall lacke no maner of pleasure

Where that dame hardynes wold afferme
By her cases that are so vnsure
That she by her power doth conferme
The knyghtes of vyctory for to be sure
Whan she doth take theyr hertes in cure
Yf fortune be awaye she may not auayle
For they by reason must lose the batayle

Yet forthermore as I do well consyder
How dame hardynes dyd expresse
Sythens the tyme that I came hyder
That she promoted had to worthynes
Hector dauid and the noble hercules
With many other wherof she fayleth
For it was fortune as she well knoweth

For in olde tyme the noble warryours
For to eschewe euer my grete daungere
In whiche tyme they were ydolestours
Than they to put hym oute of fere
To ydols went that theyr goddes were
For to haue answer yf they sholde wynne
The batayll or they dyd begynne

What nede I pleed by longe contynuaunce
As dame Sapyence dyd in maters hy
It were of tyme but dyscontynuaunce
But o dame Iustyce the gentyll lady
Loke that ye Iuge my mater ryght wysely
That I of hardynes may be the pryncypall
And of dame prudence & nature with all

Than sayd dame nature that may not be
As I can proue by ryght and reason
For I am moost confort to humanyte
As man well knoweth at euery encheason
And can not be forborne for none season
For where I lacke without ony delay
Man is but dede and turned to clay

That nature gyueth by her power
Wysedome nor hardynes may not defete
For I to man am the chefe doer
Durynge his lyfe without retrete
Also dame fortune may not well lete
Me of my course though she it thought
In sondery wyse my dedes are so wrought

Though that a man were infortunable
And though that he were neuer so folysshe
And a grete coward to fyght not able
Yet shulde he lyue and neuer perysshe
Tyll that my power of hym doth fynysshe
Whiche fayle must ones it is my proprete
And that was gyuen me by the deyte

I am the orygynall of mannes creacyon
And by me alway the world doth multyply
In welth pleasure and delectacyon
As I wyll shewe now in this party
My dedes be subtyll & wrought craftely
What were the worlde yf I were note
It were sone done as I well wote

The lawe of nature doth man bynde
Both beste foule and fysshe also
In theyr degre to do theyr kynde
Blame theym not yf they do so
For harde it is euer to ouer go
The kynde of nature in her degre
For euery thynge must shewe his proprete

Who of theyr propretes lyst to rede
Lete hym loke in the boke of barthelmewe
And to his scripture take good hede
That ryght nobly of theym do shewe
With all theyr actes beynge not a fewe
But wounderous many by alteracyon
For lyke hath lyke his operacyon

I nature norysshe by myn afflyccyon
Mannes humayne partyes superfyxcyall
And am the sprynge of his complexion
The fonteyne of his vaynes inferyall
To hym conserue mo