Classic Poem

1.

There was king's daughter lived in the north
Hey the rose an' the linsie, O
An' she has courted her father's clerk,
An' awa be the greenwood sidie, O.

2.

She courted him a year an' a day,
Till her appearance did her betray.

3.

She leant her back untill a tree,
Thinkin she would lighter be.

4.

She leant her back untill a thorn,
An' bonnie was the boys she has born.

5.

She took out her little penknife,
An' she put an end to their sweet life.

6.

She's taen the napkin fae her neck,
She made to them a linen sheet.

7.

She laid them beneath a marble stone,
Thinkin to win a maiden home.

8.

She looked ower her father's castle wa,
She saw twa bonnie boys playin at the ba.

9.

" O bonnie boys, gin ye were mine,
Ye sudna wear but the silk so fine;

10.

" The sovilne an' the grass-green silk;
Ye sudna drink but the farrow cow's milk. "

11.

" O cruel mother, when we were thine
We saw neen o your silk so fine;

12.

" Your sovilne an' your grass-green silk;
And we drank neen o your farrow cow's milk. "

13.

" O bonnie boys, can ye tell me
What kin' o a death I'll hae to dee? "

14.

" Seven year a fish in the flood,
Seven year a bird in the wood,

15.

" Seven year a warnin bell,
Seven year in deeps o hell. "

16.

" Welcome, welcome, fish in the flood,
Welcome, welcome, bird in the wood,

17.

" Welcome, welcome, warnin bell,
But the God o Heaven keep me out o hell. "