Classic Poem

dil ki bisaat kyaa thii nigaah-e-jamaal meN
ek aaiinaa thaa TuuT gayaa dekh bhaal meN

sabr aa hii jaye, gar ho basar ek haal meN
imkaaN ek aur zulm hai qaid-e-muhaal meN

aazurda is qadar huuN saraab-e-khayaal meN
jii chahtaa hai tum bhii na aao khayaal meN

tang aa ke toRtaa huuN tilism-e-khayaal ko
ya mutmaiin karo ki tumhiin ho khayaal meN

umr-e-do-roza vaaqai khwaab-o-khayaal thii
kuchh khwaab meN guzar gayii, baaqii khayaal meN