Classic Poem

Come to my arms, my sweet wee hinny,
Fair image o' thy bonny minny,
Bricht picture o' thy sainted granny,
To a' sae dear;
I gaze upon thy face, an' canna
But drap a tear.

Thy dimpled chin, thy rosy mou',
The thought that lines thy lang deep brow,
Thy dark blue een glint glintin' through
Thy faither's heart;
Thou'rt my fond mither, form'd anew
In every part.

Yes, Memory poised on Fancy's wing,
O'er the dim past flies wandering;
And, as amid the flowers o' Spring
The snaw-flake fa's,
Sae this young balmy-breathing thing
The dead reca's.

First pledge o' love, pure bud o' bliss,
Young gem o' licht and loveliness,
Ae rosy smile, ae balmy kiss
Frae thy wee mou',
Floods a' my bosom's deep recess
Wi' bliss brim fou.

Thy mither wails the crumpled lace,
While I maist smoor thy sweet wee face,
An' kiss, an' keek, and fondly trace —
Wi' parent's ee,
The blushing bloom, an' witching grace,
That daws in thee.

Thy speaking een are thrang revealing
Wee keeks o' kindness past concealing;
An' thoughts are through thy noddle stealing
In infant play,
Foretelling wit, an' sense, an' feeling,
Some future day.

What thrilling pangs gae through my heart
When thou gi'es an uncanny start;
For gudesake, dinna greet! the smart
O' deadly wound
Could ne'er to me sic pain impart
As that shrill sound.

Thy minnie's startled looks, that yearn
To ken what ails her ae wee bairn, —
What wylie ways she has to learn
To hush thy fears;
While kissing aff wi' fond concern
Thy glist'nin' tears.

Through a' the sunny daylight hours,
While nursing a' thy opening flowers,
Her fancy bigs thee mony bowers
A' fair an' green,
That keep awa the watery showers
Frae thy wee een.

She tends thee through the lang dark nights
Wi' mony kindly wyles and sleights;
Her een wauk up like starry lights
Gin thou but sigh,
Syne wi' a hush she lays thy frights,
An' stills thy cry.

There snugly nestling in her breast,
Thou cuddles in thy cozy nest;
When thou art to her bosom prest,
Heaven's ee may see
An image o' its haly rest
In her an' thee.
Bloom on, sweet babe! Time steals away!
The langest life is but a day;
An' gin thy faither, doom'd to gae,
Leaves her alane,
Thou wilt thy mither's love repay
Wi' love again.