Classic Poem

O, TELL me did ye ever see
Sweet Galla on a simmer night,
When ilka star had oped his e'e,
An' tipped the broom wi' saft pale light?
Ye'd never gang toward the town,
Ye wadna like the flauntie day,
If ance ye saw the moon blink down
Her bonnie beams on Galla Brae.

A' silent, save the wimpling tune,
The win's asleep, nae leaflet stirs;
O' gie me Galla neath the moon,
Its siller birk an' goudon furze.
There's monie another leesome glen;
But let 'em talk o' wilk they may,
O' a' the rigs an' shaws I ken
There's nane sae fair as Galla Brae.

I crept a wee thing on its sod,
A laughing laddie there I strayed;
I roved beside its burnie's tide
In morning air an' gloaming shade:
Its gowans were the first I pu'd,
An' still my leal heart loves it sae
That when I dee nae grave would be
Sic hallowed earth as Galla Brae