O! LEEZE me on the Hieland plaid, —
The tartan plaidie, tartan plaidie!
The very sight o't makes me glad —
The bonnie tartan plaidie!

It mind's me o' the happy days,
When blithe I herdit on the braes,
O' love an' a' its gladsome ways:
Be blessin's on the plaidie!
Chorus — O! leeze me on the Hieland plaid, &c.

My Sandie was the triggest lad
That ever made a lassie glad;
And O! a handsome look he had
When he put on his plaidie.
Chorus — O! leeze me on the Hieland plaid, &c.

I mind it as I mind yestreen,
When courtin' he would come at e'en:
We sat upo' the trystin' green
Beneath his tartan plaidie.
Chorus — O! leeze me on the Hieland plaid, &c.

At fairs and preachin's far and near,
Baith Sandy an' his joe were there;
An' as we hame at night did wear;
He row'd me in his plaidie.
Chorus — O! leeze me on the Hieland plaid, &c.

For monie a year, at hame a-field,
The plaidie was his cosie bield:
O! vow, he was a sonsie chield
When he gat on his plaidie.
Chorus — O! leeze me on the Hieland plaid, &c.

When winter nights were lang an' cauld,
Upo' the hill he watched the fauld,
Frae e'en to morn sae crouse an' bauld,
Weel happit in his plaidie!
Chorus — O! leeze me on the Hieland plaid, &c.

When Sandie gaed as I am gaun —
When frae our fireside he was ta'en —
They laid him low aneath the stane
Row'd in his tartan plaidie.
Chorus — O! leeze me on the Hieland plaid!
The tartan plaidie, tartan plaidie!
The very sight o't makes me glad —
The bonnie tartan plaidie!