A Song

Ae look o' her bonnie blue eyen gat I
As she in haste frae the gate did fly;
But weel I wist ere the glance gaed by —
It said " Kind sir, come and woo me " : —
" Come woo me, woo me —
Speed while ye may!
Come woo me, lad,
I'll never say nay:
I'm wae for a leman an' wearit o' hame —
Come woo me lad, but dinna bring shame " :
Said the winsome lass o' Pittodrie.

By the licht o' the mornin' she lookit sae fine,
My heart gave a leap to make the maid mine,
And honestly use her as she might incline —
By Kirk an' ring I would prove me: —
" Come woo me, woo me —
Speed while ye may:
Come woo me, lad,
The day is the day! "
Wi' mettlesome glance she ventured her love;
I vowed by my soul and the heaven above
I would win the lass o' Pittodrie.

Yestreen we were plighted I gaily declare,
And trysted the day and the folk to be there:
And I gat a token o' her yellow hair —
The flower and pride o' Pittodrie: —
I'll woo thee, woo thee,
Merriet an' a' —
I'll love thee, lass,
Whatever befa' —
I'll shield thee as kindly as ever may be,
And keep thee in honour o' high degree
O my lovely lass o' Pittodrie!