Classic Poem

My loving frende, amorous Bune,
I cum ambelyng to you by the same tokyn
that you and I have be to-geder,
and settyn by the fire in colde wether,
and wyth vs noo moo but our Gullett,
with all the knakes in hur buggett;
hur trumpett and hur merye songe
now for to here, I thinke itt longe.
Come amble me to hur, I you praye,
and to Agnes Irpe as bright as daye.
I wolde you were here to lokke our gates,
butt alas itt ys to fare to the jakes.
Fare-well faire Agnes Blakamoure,
I wolde I hadde you here in stoore,
for you wolde come with al your harte;
farewell! farewell! my ladye darke.
Commande me to Wyllum, I you desyre,
and praye hym to wyshe vs some of his fyre,
for we have none butt a coole or a stykke,
and so we dryve a-waye the weke.
and commande me also to the roughe Hollye
that turnethe itt ofte into Godes bodye,
and to all your oder felowes besyde
as well as I hadde ther names discryed.
and praye John cossall to be goode and kynde,
for the nexte yere he wylbe blynde;
and bydde Humffrey doo hym no shrowd turne,
for then Sir John muste hym worune.
and commande me to Thomson, that talle man
whiche shulde have a lather to pisse in a can;
and also to Nicholas with the blake berde,
on whome to loke itt makes me a-ferde
My vnclez and my aunte be merye and glade
and, thankes be to God, I am nott sadde,
and Christoffer, your frende, ys off goode cheere
and many tymes he wissheth hym ther.
Faire tokens I wolde have sende
butt I lakked money for to spende.
And thys, fare-you-well! the goode Newe Yere,
I pray you be merye and off good cheere,
and, for the love of swete Seynt Denyes,
att thys my letter thinke noo vnkyndnes,
for to make you all merye I doo ryme
and nowe to leave I thinke itt tyme.
Att nyne off the clokke thys was wrytten;
I wolde you were all beshetyn.