Classic Poem

I tint my heart ae morn in May,
When burdies sang on ilka tree,
When dew-draps hung on ilka spray,
And lammies played on ilka lea:
O Linton Laurie, Linton Laurie,
Aye sae fond ye trowed to be,
I never wist sae bricht a morn
Sae dark a nicht wad bring to me!

O Linton's words sae saftly fell,
Sae slee the glamour o' his ee,
That I hae never been mysel'
Sin' e'er he spak and keek't to me:
O Linton Laurie, Linton Laurie,
Come, dear Laurie, back to me;
And siccan love I bear to you,
E'en your forgettin' will forgi'e!

His absence I'll nae langer bear,
My grief I canna langer dree,
I'll gang a thousand miles an' mair,
My Laurie's manly form to see.
O Linton Laurie, Linton Laurie,
Gin ye'll come to Logan Lea,
I'll mak ye Laird o' Logan Ha',
And I your loving wife will be.