Classic Poem

I.

My bonnie bairn,
My bonnie bairn,
My bonnie bairn, there's blessin's in yer e'e.
An' O ye hae a dainty mou', dainty mou', dainty mou' —
I wat ye hae the sweetest mou'
That ever kiss't wi' me.

II.

A gentleman,
A gentleman,
A gentleman your fader's said to be:
But O he gart me rue a', rue a', rue a' —
At he'rt he gart me rue a'
Till ye cam' hame to me.

III.

He does na ken,
He does na ken,
He canna ken the bonnie boy ye be;
Or nyod I think he 'd rue a', rue a', rue a' —
For pride o' you he 'd rue a'
That twyn't his he'rt fae me.

IV.

The pleesure o' 't,
The pleesure o' 't,
The pleesure o' 't he canna ken ava:
Ye 're just the dearest nickum O, nickum O, nickum O —
Yer mither's sweetest nickum O!
An' worth the wyte o' 't a'.

V.

A bonnie lad,
A bonnie lad,
A bonnie lad I vow ye 'll come to be
For at yer he'rt there 's fire o' love, fire o' love, fire o' love;
An whar there is the fire o' love
A ferlie fouk may see.