Classic Poem

Allons, allons gay ,
M'amye, ma mignonne;
Allons, allons gay,
Gayement vous et moy.
Mon pere a fait faire ung chasteau;
Il n'est pas grant, mais il est beau.
Et allons, allons gay, etc.

D'or et d'argent sont les carneaulx,
Et si a trois beaulx chevaulx.
Et allons, allons gay, etc.

Et si a trois beaulx chevaulx;
Le roy n'en a point de si beaulx.
Et allons, allons gay, etc.

Le roy n'en a point de si beaulx;
L'un est gris, l'autre est moreau.
Et allons, allons gay, etc.

L'un est gris, l'autre est moreau,
Mais le petit est le plus beau.
Et allons, allons gay, etc.

Mais le petit est le plus beau;
Ce sera pour me porter jouer,
Pour ma mignonne et pour moy.
Et allons, allons gay, etc.

Ce sera pour me porter jouer,
Pour ma mignonne et pour moy;
G'yrons jouer sur le muguet,
Et allons, allons gay, etc.

G'irons jouer sur le muguet
Et y ferons ung chappellet.
Et allons, allons gay, etc.

Et y ferons ung chappellet,
Pour ma mignonne et pour moy.
Et allons, allons gay, etc.