Classic Poem

My love is like the lily flower
That blooms upon the lea:
I wadna gie ae blink o' her
For a' the maids I see.

Her voice is like the bonnie bird's,
That warbles 'mang the bow'rs,
Her breath is like the hawthorn when
It's wat wi' morning show'rs.

And frae the gowans o' the glen
She's caught her modest grace,
And a' the blushes o' the rose
Hae leapt into her face.

She bears aboot, I kenna hoo,
The joy o' simmer days,
The voice o' streams, and happy dreams
Amang the broomy braes.

And when the bonnie lassie smiles
Sae sweetly upon me,
Nae human tongue can ever tell
The heav'n that's in her e'e.

And a' the lee-lang simmer day
I'm in a dream divine,
And aye I wauken but to wish,
Oh, were the lassie mine!