Classic Poem

Ohie eternal God of micht!
Of thy grit grace, grant us thy licht,
With hairt and mynd sinceir,
To leif efter thy lawis richt,
Now into this new yeir.

God keip our Quein; and grace hir send
This realme to gyde, and to defend;
In justice perseveir:
And of her wawis mak an end,
Now into this new yeir.

God send grace to our Quene Regent,
Be law to mak sic punishment,
To gar lymmars foirbeir
For till oppress the innocent,
Now into this new yeir.

Lord, schent all sawars of seditioun;
Remove all rancour and suspicioun,
Quhilk may this cuntrie deir.
Put all perturbars to punitioun.
Now into this new yeir.

God send pastors of veritie,
Be quham we may instructit be
Our God to serve and feir.
And to set furth his wourd trewlie,
Now into this new yeir.

And tak awa the ignorantis
Of [tha] kirkmen that vyceis hauntis
And leidis us arreir;
That bayth gud lyf and cunning wantis;
Now into this new yeir.

God gif our lordis temporal
Grace to gif ane trew consale,
This realme to gyd and steir;
To be obedient and loyal,
Now into this new yeir.

And tak away all grit oppressours,
Comoun mantenars of transgressours,
Movears of stryf and weir,
For theves and revars intercessours,
Now into this new yeir.

Lords of the Sait, mak expeditioun,
Gar everilk man mak restitution
Of wrangus land and geir;
And we sall eik your contributioun,
Now into this new yeir.

Men of law, I pray yow mend.
Tak na ill quarels be the end
For profeit may appeir;
Invent na things to gar us spend
Our geir in this new yeir.

God grant our ladeis chastitie,
Wisdome, meiknes, and gravitie:
And have na will to weir
Thir clathing full of vanitie,
Now into this new yeir.

Bot for to weir habilyement
According to thair stait and rent.
And all thingis foirbeir,
That may thair barnis gar repent
Heirafter mony yeir.

God send our burgess' wit and skill
For to set furth the commounweil;
With lawtie sell thair geir;
And to use met and mesure leil,
Now into this new yeir.

And all vane waistours tak away;
Regrattours that tak double pay:
And wyne-sellars our deir;
Dyvours that drinkis all the day;
Now into this new yeir.

Grace be to the gud burges' wyfis,
That be leissum lawbour thryvis;
And dois vertew leir,
Thristie, and of honest lyfis,
Now into this new yeir.

For sum of thame wald be weil fed,
And lyk the quenis ladeis cled,
Thoch all thair barnes suld bleir.
I trow that sic sall mak ane red
Of all thair paks this yeir.

God send the comouns weil to wirk;
The grund to lawbour, and nocht irk,
To win gude quheit and beir;
And to bring furth bayth staig and stirk,
Now into this new yeir.

And tak awa thir ydle lounis,
Cryand wakkars, with cloutit gounis;
And sornars that ar sweir;
And put thame in the galiounis,
Now into this new yeir

I pray all staitis and degree
To pray to God continwalie
His grace to grant us heir:
And send us peax and unitie
Now into this new yeir.