Classic Poem

V IDES ut agros dulce gemmatos lavet
Argenteus rivi latex:
Virides ut aura stridulo modulamine
Arundines interstrepat:
Sic, sic, amaeno cincte virtutum choro
Princeps, amabiliter nites
Ut maximo labore, et arte maximâ
Effingit artifex ebur,
Sic ad benignitatem amica civium
Blande figuras pectora.
Ut delicata gemmulam expolit manus
Fulgore lucentem aureo,
Sic civitatem mitium gaudes tuam
Ornare morum lumine.
O quam verenda micat in oculis lenitas!
Minantur et rident simul.
O quanta pulchro dignitas vultu patet,
Et quantus incessu decor!
Scilicet, amaeno cincte virtutum choro
Princeps, amabiliter nites.
Annon per omne, veris instar, seculum,
Memoria florescet tui?