" Oh! whaur gat ye that pearly brow,
An' whaur gat ye that rosy mou',
An' whaur gat ye thae een sae blue,
That play sic pranks wi' mine, jo? "
" The ne'er a pearl there's on my brow,
The ne'er a rose blaws on my mou',
My een ye canna ken their hue,
They ne'er were raised to thine, jo. "

" Ae glance, ae sparkling glance was mine,
An' Hope has dwalt wi' me sinsyne;
Then let these stars in mercy shine
On him wha worships thee, jo. "
" Seek stars in heaven, for there they shine,
Gae worship at some haly shrine,
Pay homage to some saint divine,
Ye maunna worship me, jo. "

" But I maun love, and loving seek
Like love frae thee, sae pure and meek;
Then dinna that fair bosom steek
'Gainst ane wha loves but thee, jo. "
The lassie blush'd, she couldna speak,
Deep crimson roses flush'd her cheek,
While wi' a silent sidelang keek,
She shower'd love's light on me, jo.