Classic Poem

Returne the, hairt, hamewart agane,
And byd quhair thou was wont to be;
Thou art ane fule to suffer pane
For luve of hir that luvis not the.
My hairt, lat be sic fantesie;
Luve nane bot as thay mak the causs;
And lat hir seik ane hairt for the,
For feind a crum of the scho fawis.

To quhat effect sowld thow be thrall
But thank, sen thou hes thy fre will?
My hairt, be not sa bestiall,
Bot knaw quho dois the guid or ill;
Remane with me and tary still,
And se quha playis best thair pawis,
And lat fillok ga fling hir fill,
For feind a crum of the scho fawis.

Thocht scho be fair I will not fenyie;
Scho is the kind of uthiris ma;
For quhy thair is a fellone menyie,
That semis gud, and ar not sa.
My hairt, tak nowdir pane nor wa,
For Meg, for Meriory, or yit Mawis,
Bot be thou glaid and latt hir ga,
For feind a crum of the scho fawis.

Becaus I find scho tuik in ill,
At hir departing thou mak na cair;
Bot all begyld, go quhair scho will,
Beschrew the hairt that mane makis mair.
My hert, be mirry lait and air,
This is the fynall end and clauss,
And latt hir fallow ane filly fair,
For feind a crum of the scho fawis.