The batellis and the man I will descrive,
Fra Troys boundis first that fugitive,
By fait to Itale coyme and coist Lavyne;
Our land and see cachit with mekle pyne,
By force of goddis abuif, fro every steid,
Of cruell Juno throw ald ramembrit feid.
Greit pane in batell sufferit he also,
Or he his goddis brocht in Latio,
And belt the ciete, fra quhame, of noble fame,
The Latyne peple takin hes thair name,
And eik the faderis, princis of Alba
Come, and the valleris of greit Rome alswa.
O thou my muse, declair the causis quhy,
Quhat maiestie offendit, schaw quham by,
Or 3it of goddis quharfor the drery quene
Sa feill dangeris, sic travell maid sustene
Ane worthy man fulfillit of piete;
Is thair sic greif in hevinlie myndis hie?