Classic Poem

My minny is pawky, my minny is slee,
She keeps me aye close 'neath the kep o' her ee;
She bids me gae nurse my young billie awee,
But wots nae how sleely my Willie woos me.

What ails my auld minny at Willie an' me?
How e'er can my minny wyte Willie an' me,
When nought but the wean an' the wee butterflee
Can see the stown kiss o' my Willie an' me?

My grandfaither suns himsel' on the door-stane,
And dreams o' my grandmither lang dead and gane;
He gazes on heaven wi' his lustreless ee, —
They surely ance lo'ed like my Willie an' me!

I ken Willie's true, and I ken he's my ain,
He courts nae for gear, an' he comes nae for gain;
He leaves a' his flocks far outower on yon lee —
What true heart wad sinder my Willie an' me?

Then what ails my minny at Willie an' me?
She shouldna be sair on my Willie an' me;
Her widow's black snood brings the tear to my ee,
But weel my dead faither lo'ed Willie an' me.