… quhen thou art careit to that cuntree,
And cumin is to the citie of Cumas,
And by the lakis dedicat to goddis doith pas
Outthrow the soundand forest of Averne,
Under ane roche, law within a caverne,
Thair sall thou fynd the godly prophetes,
Full of the spreit divine, that schawis expres
The revelationis and fatis for to cum,
In palme tree leifis thame notand all and sum,
Writand wp every worde as sal betyde,
Direckand the leifis per ordour furth on syde.
Quhat evir this virgine descrive in hir endyte,
Without the cave closit sche layis the wryte:
Thai leifis remainis onsterit of thair place,
Ne partis nocht furth of reule, quhill percace
The pipand wynd blaw wp the dur on char,
And drife the levis, and blaw thame out of har
In at the entre of the cave agane,
That all hir first laubour was in vane …