Classic Poem

The trysting tree, the trysting tree,
O dear that gnarly trunk to me!
My saul hath been in heaven hie
When wooing 'neath the trysting tree.

The birds lay silent in their nests,
The flowers lay faulded on the lea,
An' a' was still, save our twa breasts,
Warm throbbing 'neath the trysting tree.

We sigh'd, we blush'd, but a' was hush'd,
For no ae word to spare had we;
But ae chaste kiss spak o' our bliss,
Aneath the dear auld trysting tree.

We made nae tryst, we changed nae vows,
But, aye when daylight closed his ee,
We somehow met aneath the boughs
O' that auld kindly trysting tree.

But grief an' time hae wrought sad wark
Upon that dear auld tree an' me;
The light that lit my soul is dark,
The leaves hae left the trysting tree.

The trysting tree, the trysting tree,
Though dear its twisted trunk to me,
It wrings my heart, and droons my ee,
To gaze upon that trysting tree.