As this convine and ordinance was mayd
Of Latium throu out the boundis braid,
Quhilk every poynt this Troiane lord anon,
Cumin of the hous of king Laomedon,
In hevy curis flowand all on flocht,
Avisis weill, hou all this thing was wrocht;
And haistilly in mynd on every sydis
Nou for this purpos, nou for that, providis,
Nou heyr, nou there, revist in syndry partis,
And seirsis, turnand to and fro all artis.
Lik as the radius sonnis bemys brycht,
Or than the glymmerand monis schaddowis lycht,
Reflexit from the brasin veschell, we se,
Fillit wyth watter to the cirkill on hie,
Our all the hous reboundis and dois spreyd
Schynand, and sersis every steyd on breid,
Quhill in the ayr upgois the tuynkilland lycht,
Glytterand on every spar and ruf on hycht.