Classic Poem

1

The wardraipper of Wenus boure,
To giff a doublett he is als doure
As it war off an futt syd frog:
Madame, ye heff a dangerous dog.

2

Quhen that I schawe to him your markis,
He turnis to me again and barkis,
As he war wirriand an hog:
Madame, ye heff a dangerous dog.

3

Quhen that I schawe to him your wrytin,
He girnis that I am red for bytin —
I wald he had an hawye clog:
Madame, ye heff an dangerous dog.

4

Quhen that I speik till him freindlyk,
He barkis lyk an midding tyk,
War chassand cattell throu a bog:
Madam, ye heff a dangerous dog.

5

He is an mastive, mekle of mycht,
To keip your wardroippe ouer nycht
Fra the grytt sowdan God Magog:
Madam, ye heff a dangerous dog.

6

He is ower mekle to be your messan.
Madam, I red you, get a less an.
His gang garris all your chalmeris schog.
Madam, ye heff a dangerous dog.