Classic Poem

Ye, that sumtym hes bene weil stakit,
Thoch of your geir sum be inlakit,
And yourself into troubil brocht;
Of this fals warld tak never thocht.

To sum thair is bot litle left;
Bot, with grit wrang, ar planelie reft
With devil's lyms, that never docht.
Of this fals warld yit tak na thocht.

Of houshold grayth sum richt skant war
With uther's geir now planeist ar,
Better nor ever thair faders bocht.
Of this fals warld yit tak na thocht.

To reif their neichbour few now rakis,
For feir of God; bot daylie takis
Fra thame that never aucht thame ocht.
Of this fals warld yit tak na thocht.

Sum to thair freynd war sa faythles,
That, under colour of kyndnes,
Thame to destroy did all thai mocht.
Of this fals warld yit tak na thocht.

Sum, that richt weil planeist hes bene,
Thair landis now are wastit clene
With comoun theifs, that leifis nocht.
Of this fals warld yit tak na thocht.

Destroyit is the policie,
For the maist pairt, of this cuntrie:
To wraik the rest seir wayis ar socht.
Of this fals warld yit tak na thocht.

I hoip the tyme sall cum schortlie
Sall gar all wickit cumpanie
Repent the wrang that thai have wrocht:
For punissing thai sall tak thocht.