Classic Poem

Air — Clean Pease-strae.

When John and me were married,
Our hading was but sma',
For my minnie, canker't carling,
Wou'd gi'e us nocht ava';
I wair't my fee wi' canny care,
As far as it wou'd gae,
But weel I wat our bridal bed
Was clean pease-strae.

Wi' working late and early,
We're come to what you see,
For fortune thrave aneath our hands,
Sae eydent aye were we.
The lowe of love made labour light,
I'm sure ye'll find it sae,
When kind ye cuddle down, at e'en,
'Mang clean pease-strae.

The rose blooms gay on cairny brae,
As weel's in birken shaw,
And love will lowe in cottage low,
As weel's in lofty ha'.
Sae, lassie, take the lad ye like,
Whate'er your minnie say,
Though ye should make your bridal bed
Of clean pease-strae.