Classic Poem

When Princes and Prelates and het-headed zealots
All Europe hae set in a lowe,
The poor man lies down, nor envies a crown,
And comforts himsel with a mowe. —

Chorus

And why shouldna poor folk mowe, mowe, mowe,
And why shouldna poor folk mowe:
The great folk hae siller, and houses and lands,
Poor bodies hae naething but mowe. —

2

When Br-nsw-ck's great Prince cam a cruising to Fr-nce
Republican billies to cowe,
Bauld Br-nsw-c's great Prince wad hae shawn better sense,
At hame with his Princess to mowe. —
And why should na &c. —

3

Out over the Rhine proud Pr-ss-a wad shine,
To spend his best blood he did vow;
But Frederic had better ne'er forded the water,
But spent as he docht in a mowe. —
And why &c. —

4

By sea and by shore! the Emp-r-r swore,
In Paris he'd kick up a row;
But Paris sae ready just leugh at the laddie
And bade him gae tak him a mowe. —
And why &c. —

5

Auld Kate laid her claws on poor Stanislaus,
And Poland has bent like a bow:
May the deil in her a — ram a huge pr-ck o' brass!
And damn her in h-ll with a mowe!
And why &c. —

6

But truce with commotions and new-fangled notions,
A bumper I trust you'll allow:
Here 's George our gude king and Charlotte his queen,
And lang may they tak a gude mowe!