Onto the hallowit steid bryng in, thai cry,
The greite figure, and lat ws sacrify
The halie goddes, and magnify hir mycht
With orisonis and offerandis day and nycht.
Quhat will ge mair? the barmekin down we rent,
And wallis of our cietie we made patent;
Onto thair werk all sped thame beselie;
Turnand quhelis thai set in, by and by,
Under the feit of this ilk bisnyng jaip;
About the nek knyt mony bassyn raip:
The fatale monstour clame our the wallis then,
Greit wamit and stuffit full of armyt men;
And thair about ran childring and maidis ging,
Singand carellis and dansand in a ring;
Full wele was thame, and glaid was every wycht,
That with thair handis anis twich the cordis mycht.
Furtht drawin haldis this subtell hors of tree,
And manysand strydis throw the myd cietie.
O native cuntre, and ryall realme of Troy!
O goddis hous Ilion full of joy!
O worthy Troiane wallis chevalrus!
Four tymes stoppit that monster perellus,
Evin at the entre of the portis wyde,
And four sise the armour, that ilk tyde,
Clinkit and rang amyd the large belly.
Bot notheles, intill our blind fury,
Forgetting this, instantlie we wyrk,
And for to drug and draw wald never irk,
Quhill that myschancy monstir, quentlie bet,
Amyd the hallowit temple wp was set.
Cassandra than the faitis to cum tald plane,
Bot, by command of Phebus, all was in vane;
For thocht scho spayit the suitht, and maid na bourd,
Quhatevir scho said, Troianis trowit nevir a wourd.
The tempillis of goddis and sanctuaris all,
We fey peple, allace! quhat say I sall?
Quham till this was the dulefull lettir day,
With festuall flouris and bewis, as in May,
Did weill annorne, and feist and riot maid
Throwout the towne, and for myscheif was glaid.