Classic Poem

Oh, will thae pawky een o' thine
Never tire o' killin'?
Gudesake! mind this heart o' mine
Canna aye be thrillin'.
Although ane's heart might thole ae wound,
An' time might close the hole in't,
Ilk piercing glance sae gaurs it stound,
That there's nae langer tholin't.
Ye're ower bonnie, ye're ower bonnie,
Sae steek that witchin' ee,
Its light flees gleamin' through my brain,
An' dings me a' ajee.

A hunder times ye've dang me daft
Wi' your light-hearted daffin',
Aye echoin' back my words sae saft,
Wi' noisy merry laughin'.
Yet ye're sae sweet, ye maun be kind;
I vow I'll leave thee never;
Shine like the sun, I'll gaze till blind,
Adorin' thee for ever.
Ye're ower bonnie, ye're ower bonnie,
Yet oh that witchin' ee,
Whase light flees gleamin' thro' my brain,
Is love an' life to me!