Man upon mold, whatsoever thou be,
I warn utterly thou gettest no degree,
Ne no worship abid with thee,
But thou have the peny redy to tak to.

If thou be a yeman, a gentleman wold be,
Into sum lordes cort than put thou thee:
Lok thou have spending, larg and plente,
And alway the peny redy to tak to.

If thou be a gentleman and wold be a squire,
Ridest out of cuntre as wild as eny fire:
I thee warn as my frend thou failest of thy desire
But thou have the peny redy to tak to.

If thou be a squire and wold be a knight,
And darest not in armur put thee in fight,
Than to the kinges cort hy thee full tight,
And lok thou have the peny redy to tak to.

If thou be a lettred man to ber estat in scole,
A pilion or taberd to wer in hete or cole,
Thee to besy therabout I hold thee but a fole,
But thou have the peny redy to tak to.

If thou be a bachelar and woldest ever thrive,
Prickest out of contre and bringest home a wife:
In much sorow and car ledest thou thy life,
But thou have the peny redy to tak to.

If thou be a marchant to buy or to sell,
And over all the countre woldest bere the bell,
I thee connsell as a frend at home to dwell,
But thou have the peny redy to tak to.

If thou be a yong man, in lust thy life to lace,
About chirch and market the bishop will thee chace:
And if thou mayst be get thou getes nouther grace,
But thou have the peny redy to tak to.

If thou have out to do with the law to plete,
At London at the parvis many on will thee rehete:
I warne thee com not ther but thy purse may swete,
And that thou have the peny redy to tak to.