Classic Poem

Tune — Buy broom Besoms

Wha will buy my Troggin,
Fine Election Ware;
Broken trade o' Br — —
A' in high repair.

Chorus

Buy braw Troggin,
Frae the Banks o' Dee!
Wha want Troggin,
Let them come to me.

Here 's a noble Earl's
Fame and high renown,
For an auld sang —
It's thought the Gudes were stown.
Buy braw Troggin, &c.

Here 's the Worth o' Br — — ,
In a needle's e'e:
Here 's a reputation,
Tint by B — — .
Buy braw Troggin, &c.

Here 's an honest conscience,
Might a Prince adorn,
Frae the Downs o' T — — ,
— So was never worn.
Buy braw Troggin, &c.

Here 's its Stuff and Lynin,
C — — ss's Head;
Fine for a Soger,
A' the wale o' lead.
Buy braw Troggin, &c.

Here 's a little Wadset,
B — ttle's scrap o' Truth;
Pawn'd in a gin-shop,
Quenching haly drouth.
Buy braw Troggin, &c.

Here 's Armorial Bearings,
Frae the Manse of — — ;
The crest, an auld crab-apple,
Rotten at the core.
Buy braw Troggin, &c.

Here is Satan's Picture,
Like a bizzard-gled,
Pouncing poor R — — tle,
Sprawlin as a tade.
Buy braw Troggin, &c.

Here 's the Font where D — —
Stane and mortar names;
Lately us'd at C — — ,
Christening M — — 's crimes.
Buy braw Troggin, &c.

Here 's the Worth and Wisdom
C — — n can boast;
By a thievish Midge
They had been nearly lost.
Buy braw Troggin, &c.

Here is M — — 's Fragments
O' the Ten Commands;
Gifted by Black Jock
— To get them off his hands.
Buy braw Troggin, &c.

Saw ye e'er sic Troggin?
If to buy ye're slack,
Hornie's turning Chapman,
He'll buy a' the Pack!

Buy braw Troggin,
Frae the Banks o' Dee!
Wha want Troggin,
Let them come to me.