Classic Poem

Whare are you gaun, my bony lass,
Whare are you gaun, my hiney.
She answer'd me right saucilie,
An errand for my minnie.

O whare live ye, my bony lass,
O whare live ye, my hiney.
By yon burn-side, gin ye maun ken,
In a wee house wi' my minnie.

But I foor up the glen at e'en,
To see my bony lassie;
And lang before the grey morn cam,
She was na hauf sae saucey.

O weary fa' the waukrife cock,
And the foumart lay his crawin!
He wauken'd the auld wife frae her sleep,
A wee blink or the dawin.

An angry wife I wat she raise,
And o'er the bed she brought her;
And wi' a meikle hazel rung
She made her a weel pay'd dochter.

O fare thee weel, my bony lass!
O fare thee weel, my hinnie!
Thou art a gay and a bony lass,
But thou has a waukrife minnie.