Classic Poem

Nae sweetheart ha'e I,
Yet I'm no that ill-faur'd:
But there's ower monie lasses,
An' wooers are scaur'd.
This night I the hale
O' my toucher would gi'e
If a' ither bodie
Were married but me.

Syne I would get plenty
About me to speer —
Folk wou'dna be fashions
'Bout beauty or gear.
Hearts broken in dozens
Around I would see,
If a' ither bodie
Were married but me.

Ae lover would ha'e
A' my errands to rin;
Anither should tend me
Baith outby an' in;
And to keep me gude-humour'd
Would tak twa or three,
If a' ither bodie
Were married but me.

Fond wooers in dozens
Where I ha'ena ane,
An' worshippin' hearts
Where I'm langin' alane —
Frae mornin' to e'enin'
How bless'd would I be,
If a' ither bodie
Were married but me?

A daft dream was yon —
It has faded awa':
Nae bodie in passin'
E'er gi'es me a ca':
Nae sweetheart adorin'
I ever shall see,
Till a' ither bodie
Be married but me!