Classic Poem

“Your wealth's in your purse, and my wealth's in my hame,
In twa bonny bairns, an' a wee comely dame:
Your gowd and your siller may tak wings an flee,—
My wife an' my weanies will cling aye to me.”

“A wife an' twa weanies are gey costly gear,
When siller is scarce, and when markets are dear;
A bag o' red gowd, under good lock an' key—
Oh, that is the wealth that fin's favour wi' me.”

“Our table o' dainties is whiles unco scant,
Yet gude hamilt mercies, thank God, we ne'er want;
We're no ill to haud here, and when we're set free,
My wife and my weans will gang heavenward wi' me.”

“Troth, Johnnie, ye're right!—There's my heart an' my hand,
There's half o' my treasure, and half o' my land;
They canna gang wi' me when I come to dee,
Sae, Johnnie, look out a bit wifie for me.”